අපේ සේවය පැතිරුණු තැන්
පසුගිය වසර 15 තුළ අකුරැස්ස, අත්තලච්චේනායි, අරණායක, බද්දේගම, මඩකලපුව, බලන්ගොඩ, බෙන්තොට, බේරුවලල, කොළඹ, දඹුල්ල, දඩැල්ල, ඊචලම්පත්තු, ගාල්ල, හැටන්, හබරන, හික්කඩුව, කළුතර, කඹුරුපිටිය, කාත්තන්කුඩි, කොත්මලේ, කළුකැලේ, කන්තලේ, කල්ලඩි, කැබිතිගොල්ලෑව, කැළණිය, කෑගල්ල, මහනුවර, කුරුවිට, කිලිවට්ටි, ලින්කපුරම්, මතුගම, මාතර, මීපිළිමාන, මොරටුව, මැදවච්චිය, මාවනැල්ල, මුන්දලම, නුවර එළිය, ඔඞ්ඩමාවඩි, පිළියන්දල, පුත්තලම, පේරාදෙණිය, පොළොන්නරුව, රම්බුක්කන, රත්නපුර, සාර්තපුරම්, තිහගොඩ, තලවාකැලේ, තවලන්තැන්න, ත‍්‍රිකුණාමලය, උප්පුවෙල්ලි, විජිතපුර, වනාතවිල්ලූව, වාලච්චේන, වල්ගම, වරකපොල සහ යාල ඇතුඵ ශ්රී ලංකාවේ නගර සහ ගම්මාන 50 කට අධික සංඛ්‍යාවක EQUAL GROUND සේවය කර තිබේ. මෙම ප්රදේශවල ජනතාව දැනුවත් කිරීමට සහ LGBTIQ ප්රජාව මුහුණදෙන ගැටලු පිළිබඳ ජනතාව සංවේදී කිරීමට EQUAL GROUND කටයුතු කරයි.
කොළඹ අභිමානය සැමරුම්
ශ්රී ලංකාවේ, LGBTIQ ප්‍රජාවට ඉතා වැදගත් උත්සවයක් වන වාර්ෂික PRIDE සැමරුම් පවත්වන එකම සංවිධානය EQUAL GROUND වේ. ශ්රී ලංකාවේ PRIDE සැමරුම් මේ වන විට කුඩා පරිමාණයෙන් ක්රියාත්මක වන අතර, අපගේ අයිතිවාසිකම් ඉල්ලා එක් දිනක් පාගමනේ යෙදීම ඉන් අපි බලාපොරොත්තු වන නමුත්, වර්තමාන දේශපාලන වාතාවරණය සහ LGBTIQ පුද්ගලයින්ට එරෙහි පීඩාකාරී නීති, මෙවැනි සාමකාමී පාගමනකට බාධා පමුණවයි. එබැවින්, PRIDE සැමරුම් පැවැත්වෙන්නේ පෞද්ගලිකව නමුත් උත්සවාකාරයෙන් වන අතර ඊට ශ්රී ලංකාව පුරා විසිරී සිටින බොහෝ පුද්ගලයින් සහභාගී වේ. PRIDE සැමරුම ක්‍රමයෙන් ශක්තියමත්ව වර්ධනය වී ඇති අතර කුවියර ප්‍රජාවට ආඩම්බරයෙන් පිටතට පැමිණීම දිරිගැන්වීම සඳහා සෑම වසරකම විවිධාකාර උත්සව පවත්වනු ලැබේ. එය ශ්රී ලාංකික පුරවැසියන් කුවියර ප්රජාව වඩා හොඳින් අවබෝධ කර ගැනීම සහ පිළිගැනීම ලබා දීම සඳහා උනන්දු කරවීමේ අරමුණින් කෙරෙන අධ්‍යාපනික ව්‍යායාමයක් ද වේ. PRIDE සැමරුම සඳහා වැඩමුළු, නාට්‍ය / සංදර්ශන / සංගීත, චිත්රපට දර්ශන, චිත්‍ර හා ඡායාරූප ප්‍රදර්ශන, සාද, සරුංගල් සැණකෙලි යනාදිය ඇතුළත් වේ. කොළඹ අභිමානය සැමරුමෙහි අනිවාර්ය අංගයක් වන අභිමානි කුවියර චිත්රපට උළෙල 2019 දී 15 වන සංවත්සරය සමරනු ලැබීය.
උපදේශනය
LGBTIQ පුද්ගලයින් සඳහා අපගේ උපදේශන සේවාව 2005 දී ආරම්භ කරන ලදී. අපි දැන් භාෂා 3 කින් (ඉංග්‍රීසි, සිංහල සහ දෙමළ) උපකාරක ඇමතුම් සේවාවක් ක්රියාත්මක කරන අතර අපගේ දැනට සිටින කාර්ය මණ්ඩලය විසින් කාන්තාවන් සඳහා ඔවුන්ටම වෙන්වූ සමරිසි කාන්තා උපකාරක ඇමතුම් සේවාවක් ද සංක්රාන්ති සමජභාවී කාන්තාවන් සඳහා ඔවුන්ටම වෙන් වූ තවත් උපකාරක ඇමතුම් සේවාවක් ද පවත්වා ගෙන යනු ලැබේ.
මෑතකදී, ස්කයිප්, වයිබර්, ඊමේල් හෝ ඉන්ස්ටග්රෑම් හරහා ද අපගේ උපදේශන සහ මානසික සෞඛ්‍ය සහාය ලබා දීම ආරම්භ කරන ලදී. එය ක්රියාත්මක වන්නේ සුදුසුකම් ලත් මානසික සෞඛ්‍ය වෘත්තිකයෙකු යටතේ ය. ඇය දැනට එක්සත් ජනපදයේ වසාර් විද්‍යාලයේ (Vassar College) LGBTQ සහ ස්ත්රී පුරුෂ සම්පත් අධ්‍යක්ෂක ලෙස කටයුතු කරයි. මෙම සේවාව සිංහල හා ඉංග්‍රීසි භාෂාවලින් ලබා ගත හැකිය.
ආරක්ෂිත අවකාශ
EQUAL GROUND කොළඹ කාර්යාලය LGBTIQ ප්රජාව සඳහා ආරක්ෂණ පියසක් ලෙස ක්‍රියා කරන අතර එය වැඩමුළු, චිත්රපට දර්ශන, විරුද්ධ ලිංගික ඇඳුම් ඇඳීමේ සන්ධ්‍යා සාදයන්, තේමාවන් මත පදනම් වූ රාත්‍රී සාදයන් වැනි බාහිර ක්‍රියාකාරකම් සඳහා යොදා ගැනේ.
ප‍්‍රකාශන (ත්‍රෛභාෂික)
අධ්‍යාපනික මූලාශ‍්‍ර හා පර්යේෂණ ප‍්‍රකාශයට පත් කිරීම අපගේ මෙහෙයුම්වල හා උපදේශනයේ අනිවාර්ය අංගයකි. කරුණාකර අපගේ නවතම ප‍්‍රකාශන සඳහා ‘සම්පත් / ලේඛන’ පිටුව බලන්න.
අනුස්මරණ උත්සව
- ජාත්‍යන්තර කාන්තා දිනය
- සමරිසි, සංක්රාන්ති සමාජභාවී, ද්විරිසි භීතිකාව එරෙහි ජාත්‍යන්තර දිනය (IDAHOBIT)
- සංක්රාන්ති සමාජභාවී අනුස්මරණ දිනය
- සංක්රාන්ති සමාජභාවී දෘශ්‍යතා දිනය
- සමරිසි කාන්තා දෘශ්‍යතා දිනය
- කාන්තා හිංසනය තුරන් කිරීමේ ජාත්‍යන්තර දිනය (ක්රියාකාරී දින 16 ක්)
- ලෝක ඒඞ්ස් දිනය
- මානව හිමිකම් දිනය
ඉහත දිනයන් සැමරීම සඳහා ප‍්‍රචාරණ ව්‍යාපාර, වැඩසටහන්, පෝස්ටර් සහ ස්ටිකර් ව්‍යාපාර සහ සාකච්ඡා සංසද පවත්වනු ලැබේ.
දේශීය ආයතන හවුල් කර ගැනීම (සංවේදීකරණ වැඩසටහන්)
LGBTIQ ප්රජාව පිළිගැනීම ප්‍රවර්ධනය කිරීම සඳහා මෙරට ආයතන වලට ප්රධාන කාර්යභාරයක් ඉටු කල හැක. රැකියා ස්ථානය තුළ විවිධත්වය ඇති කරමින් LGBTIQ ප්‍රජාවට සේවා අවස්ථා ලබා දීම, ආයතනික පරිසරය තුළ ඔවුන් මුහුණ දෙන ගැටළු පිළිබඳව කතිකාවතක් ගොඩනගමින් සංවේදීකරණය ඇති කිරීම හරහා LGBTIQ ප්රජාව දෛනිකව මුහුණ දෙන වෙනස් කොට සැලකීම් අවම කරගත හැකි වනු ඇත. John Keells Holdings සහ Sapphirus Lanka යන ආයතන සමඟ මෙය අප සාර්ථකව කළ අතර ඔවුන්ගේ දිවයින පුරා විසිරී සිටින කාර්ය මණ්ඩල සාමාජිකයින් 5000 කට අධික සංඛ්‍යාවක් සංවේදීකරණය කෙරුණු අතර එම සමාගම් ලිංගික දිශානතිය සහ ස්ත්රී පුරුෂ සමාජභාවී ප්‍රකාශනය / අනන්‍යතාවය (SOGIE) සඳහා ආරක්ෂාව සහතික කිරීම සඳහා ඔවුන්ගේ ආයතනික ප්‍රතිපත්ති ද වෙනස් කළහ.
මාධ්‍ය සංවේදීකරණ වැඩසටහන්
සමානාත්මතාවය සඳහා වන අපගේ අඛණ්ඩ ප‍්‍රයත්නය වෙත මාධ්‍යවල සහාය ලබා ගැනීම සඳහා, 2015 දී EQUAL GROUND සංවිධානය මෙරට මාධ්‍ය ආයතන වෙත සංවේදීකරණ වැඩමුළු ගණනාවක් සම්බන්ධීකරණය කිරීම සඳහා ශ්රී ලංකා පුවත්පත් ආයතනය සමඟ සමීපව කටයුතු කළේය. LGBTIQ පුද්ගලයින් සහ සමස්ත ප්රජාව සම්බන්ධව යෝග්‍ය, සංවේදීකෘත හා සත්‍යවාදී ආකාරයට වාර්තාකරණයේ යෙදීම පිළිබඳව මාධ්‍ය දැනුවත් කිරීම සඳහා 2017 සිට වර්තමානය දක්වා EQUAL GROUND විසින් වාර්ෂිකව වැඩමුළු කිහිපයක් පවත්වා ඇති අතර එය අඛණ්ඩව කරගෙන යනු ඇත.
ග්රාමීය ප‍්‍රජා පාදක සංවිධාන, LGBTIQ ආධාරක කණ්ඩායම් සහ තනි පුද්ගල LGBTIQ ක්රියාකාරීන්ගේ තාක්ෂණික හැකියාව වැඩි දියුණු කිරීම
EQUAL GROUND තමා සමඟ වැඩ කරන බොහෝ කණ්ඩායම් සහ පුද්ගලයින්ගේ හැකියාවන් වැඩි දියුණු කරයි. මෙයට ග්රාමීය ප්රදේශවල ප‍්‍රජා පාදක සංවිධාන, LGBTIQ ආධාරක කණ්ඩායම් සහ පුද්ගලයින් සහ අනෙකුත් කුඩා ග්රාමීය රාජ්‍ය නොවන සංවිධාන ඇතුළත් වේ. ස්ත්රී පුරුෂ සමාජභාවය හා පුරුෂාධිපත්‍යය, ස්ත්රී පුරුෂ සමාජභාවය මත පදනම් වූ හිංසනය, ලිංගිකත්වය, මානව හිමිකම්, HIV / ඒඞ්ස් වැළැක්වීමේ ක‍්‍රමවේදයන්, ලිංගික හා ප‍්‍රජනක සෞඛ්‍යය, උපදේශනය, ව්‍යාපෘති කළමනාකරණය යනාදිය මෙම පුහුණුවලට ඇතුළත් වේ. ඊට අමතරව, කලාපීය සමරිසි කාන්තා සහ ද්විරිසි කාන්තා සංවිධාන සහ පුද්ගලයින්ගේ ධාරිතාවය ඉහළ නැංවීමට EQUAL GROUND විසින් ආරක්ෂාව සහ ආයතනික කළමනාකරණය, උපදේශක කටයුතු, ස්ත්රී පුරුෂ සමාජභාවය සහ නායකත්වය, සමරිසි හිංසනය සහ වෛරී අපරාධ සහ පර්යේෂණ ක‍්‍රමවේදයන් සඳහා යෝග්‍යකාර්තා මූලධර්ම (Yogyakarta Principles) උපයෝගී කර ගැනීම යනාදී විවිධ විෂයයන් පිළිබඳ පුහුණු සැසි ද පවත්වා ඇත.
වාර්තා චිත්රපට
EQUAL GROUND විසින් “PRIDE 2006”, “Heaven’s Trauma” (2006 සුනාමිය), “Repeal Section 365A” (2011) වැනි උපදේශන වාර්තා චිත්රපට කිහිපයක් නිෂ්පාදනය කර ඇත. ඊට අමතරව, “I Have a dream” (2008), “Rainbow Runway” (2010), “The Auntie Netta show” (2011), Rainbow Runway (2013), සහ Invisible Stain (2015) වැනි දීර්ඝ වාර්තා චිත‍්‍රපටද සකසා ඇත. ”අභිමානය හැර අන් කිසිවක් නැත” (Nothing but Pride) යන මාතෘකාව යටතේ 2015 දී කොළඹ අභිමානය උළෙල සඳහා සංගීත වීඩියෝවක් EQUAL GROUND විසින් නිෂ්පාදනය කළ අතර එය දේශීය මෙන්ම විදේශීය පේ‍්‍රක්ෂකයින්ගේ ද අතිමහත් ආදරයට පාත‍්‍ර වූවකි. EQUAL GROUND විසින් උපදේශන වාර්තාකරණය දිරිමත් කරන අතර දෘශ්‍ය උපදේශනය තුළින් සංවේදීකරණය කිරීම කෙරෙහි අවධානය යොමු කර ඇත.
යෞවන ජාලය
EQUAL GROUND යෞවන ජාලය ශ්රී ලංකාවේ තාරුණ්‍යය සමඟ, විශේෂයෙන් මානව හිමිකම් කෙරෙහි අවධානය යොමු කරන අය සමඟ, ජාලගත කිරීම සහ LGBTIQ තරුණ තරුණියන්ගේ ගැටළු වෙත ප්රධාන ධාරාවේ අවධානය යොමු කිරීම අරමුණු කර ගෙන ඇත.
සංක්රාන්ති සමාජභාවී ව්‍යාපෘතිය
2012 දී ක්රියාත්මක කළ සංක්රාන්ති සමාජභාවී ව්‍යාපෘතියට ක්ෂේත‍්‍ර චාරිකා, සමාජ රැස්වීම්, HIV සහ ලිංගාශ්රිත රෝග වැඩමුළු, ස්ත්රී පුරුෂ සමාජභාවය හා ලිංගිකත්වය පිළිබඳ වැඩමුළු, සංක්රාන්ති සමාජභාවී ලිංගික සම්බන්ධතා, SRS සහ සෞඛ්‍යය පිළිබඳ අවධානය යොමු කළ සාකච්ඡා සහ සංක්රාන්ති සමාජභාවී ජාලය යනාදිය ඇතුළත් වේ. ඒ සියල්ලම සංක්රාන්ති සමාජභාවීන්ගේ ජීවිත වැඩිදියුණු කිරීම අරමුණු කර ගෙන ඇත. මේ හරහා සංක්රාන්ති සමාජභාවීන්ට ම විශේෂිත උපදේශන සේවාවක් ද ස්ථාපිත කර ඇත.
සමරිසි සහ ද්විරිසි කාන්තා ශිෂ්‍යත්ව
2013 සිට EQUAL GROUND විසින් අඩු වරප‍්‍රසාදිත සමරිසි කාන්තා සහ ද්විරිසි කාන්තාවන්ට ශිෂ්‍යත්ව ලබා දී ඇත. මැහුම් ගෙතුම්, හඳුන්කූරු සෑදීම, රූපලාවණ්‍ය කටයුතු, ඡායාරූපකරණය සහ ඉවුම් පිහුම් වැනි විවිධ ක්ෂේත‍්‍රයන්හි නියැලෙන අනුරාධපුර, පුත්තලම, නුවර එළිය, ගාල්ල සහ කොළඹ යන ප්රදේශවල කාන්තාවන් 25 දෙනෙකු මෙම වැඩසටහනෙන් ප‍්‍රතිලාභ ලබා ඇත.
LGBTIQ අයගේ පවුල් සහ මිතුරන්
LGBTIQ හි පවුලේ අය සහ මිතුරන් වෙනුවෙන් FFLGBTIQ නමින් LGBTIQ ප‍්‍රජාවේ පවුලේ අයට සහ මිතුරන්ට අදාළ ගැටළු සාකච්ඡා කිරීමට සහ එකිනෙකාට සහයෝගය දැක්විය හැකි පරිසරයක් නිර්මාණය කිරීමට වැඩසටහනක් ක්රියාත්මක කරන ලදී. මෙම ක‍්‍රියාකාරීත්වය තුළින් ආණ්ඩුක්රම ව්‍යවස්ථාව යටතේ අයිතීන් රැක ගැනීම සඳහා නඩු පැවරීම දිරිගැන්වීම සහ LGBTIQ පුද්ගලයින්ට වෙනස් කොට සලකන නීති අහෝසි කිරීම සහ LGBTIQ අයිතිවාසිකම් තවදුරටත් ඉදිරියට ගෙන යාමට දායක වන ශක්තිමත් ජාලයක් ගොඩනැගීම අපේක්ෂා කෙරිණි. PRIDE සැමරුම් වලදී සංසද කිහිපයක් ආරම්භ කර ඇති අතර ඉන් ශක්තිමත් පදනමක් ස්ථාපිතව පවතී.
වෙබ් අඩවිය සහ සමාජ ජාල
EQUAL GROUND වෙත මෙම වෙබ් අඩවිය (ත්‍රිභාෂා), EQUAL GROUND බ්ලොග් අඩවිය සහ ෆේස්බුක්, ට්විටර්, යූටියුබ් සහ ඉන්ස්ටග්රෑම් ගිණුම් හරහා ප‍්‍රවේශ විය හැකිය.
ජාත්‍යන්තර උපදේශනය
අපගේ උපදේශන කටයුතු ගෝලීය හා ජාතික යන දෙඅංශයෙන්ම වේ. එක්සත් ජාතීන්ගේ මට්ටමින්, අපි 2008 සිට UPR, CEDAW, ICCPR, CRC, ICESCR වෙත නිරන්තරයෙන් වාර්තා ඉදිරිපත් කර ඇත්තෙමු.
2004 සිට 2014 දක්වා අන්තර්ජාතික සමරිසි කාන්තා, සමරිසි පුරුෂ, ද්විරිසි, සංක්රාන්ති සමාජභාවී සහ අන්තර්ලිංගික සංගමයේ (ILGA) විධායක මණ්ඩලයේ කලාපීය නියෝජිත, සහ සම ලේකම් තනතුරු යටතේ EQUAL GROUND සහ ශ්රී ලංකාව නියෝජනය කෙරිණි.
EQUAL GROUND යනු පොදුරාජ්‍ය මණ්ඩලීය සමානාත්මතා ජාලයේ (The Commonwealth Equality Network) ආරම්භක සාමාජිකයෙකු වන අතර අපගේ විධායක අධ්‍යක්ෂකවරිය මෙම සංවිධානයේ පළමු සභාපතිවරයා විය (2015-2020). පොදුරාජ්‍ය මණ්ඩලීය සමානාත්මතා ජාලය යනු ලිංගික දිශානතිය සහ ස්ත්රී පුරුෂ සමජභාවිය අනන්‍යතාවය මත පදනම්ව පොදුරාජ්‍ය මණ්ඩලයේ රටවල් තුල පවතින අසමානතාවයට අභියෝග කිරීමට කටයුතු කරන පොදුරාජ්‍ය මණ්ඩලීය සිවිල් සමාජ සංවිධාන ජාලයකි. පොදුරාජ්‍ය මණ්ඩලීය LGBT ප්‍රජාවන්ට හඬක් ලබා දීමේ අරමුණින් සහ පොදුරාජ්‍ය මණ්ඩලීය ගැටලුවකට පොදුරාජ්‍ය මණ්ඩලීය විසඳුමක් සොයා ගැනීම සඳහා උපදෙස් ලබා දීමේ අරමුණින් මෙම ජාලය පිහිටුවන ලදී. පොදුරාජ්‍ය මණ්ඩලීය සමානාත්මතා ජාලය යනු පොදුරාජ්‍ය මණ්ඩලය තුළ ඇති එකම පිළිගත් LGBT ජාලය/සංවිධානයයි.
EQUAL GROUND දකුණු ආසියාවේ RFSU/SIDA LGBT ජාලය පිහිටුවීමේ වැදගත් කොටස්කරුවෙකි. මෙම ජාලය සමරිසි ස්ත්රී/පුරුෂ, ද්වීරිසි, සහ සංක්රාන්ති ලිංගික පුද්ගලයින්ගේ අයිතිවාසිකම් සහ සෞඛ්‍ය (HIV ඇතුළුව) වැඩි දියුණු කිරීම වෙනුවෙන් වැඩ කරන බංගලාදේශය, පාකිස්තානය, ඉන්දියාව, නේපාලය සහ ශ්රී ලංකාව යන රටවල ආයතන සහ ක්රියාකාරීන්ගේ සහයෝගතා ජාලයකි.
විපර්යාසය වෙනුවෙන් නව්‍යකරණය (Innovation for Change - I4C) ජාලය සඳහා දකුණු ආසියානු කේන්ද්‍රය EQUAL GROUND විය. එය සිවිල් අවකාශය ආරක්ෂා කිරීමට, සහ සමූහ ගත වීමේ, ඇසුරු කිරීමේ සහ කතා කිරීමේ මූලික නිදහසට ඇති සීමාවන් මඟහරවා ගැනීම සඳහා එක්ව වැඩ කරන පුද්ගලයින්ගේ සහ සංවිධානවල ගෝලීය ජාලයකි.
EQUAL GROUND විසින් SAHARA Sri Lanka හි දේශීය නියෝජිත සඳහා සත්කාරකත්වය ද සපයනු ලැබීය. SAHARA (ලිංගිකත්වය සහ ස්ත්රී පුරුෂ සමාජභාවී අනන්‍යතාවය/ප්‍රකාශනය හේතුවෙන් අගතියට පත්වී සිටින පුද්ගලයින්ගේ දකුණු ආසියානු මානව හිමිකම් සංගමය) මගින් දකුණු ආසියානු කලාපයේ ලිංගිකත්වය හා ස්ත්රී පුරුෂ සමාජභාවයට එරෙහි මානව හිමිකම් උල්ලංඝනයන් ක්‍රමානුකූලව ලේඛනගත කිරීම, ඒවාට ප්‍රතිචාර දැක්වීම සහ මානව හිමිකම් පිළිගැනීම, ආරක්ෂා කිරීම සහ ප්‍රවර්ධනය කිරීම සිදු කෙරේ. EQUAL GROUND චිකාගෝ හි හාට්ලන්ඞ් එලායන්ස් (Heartland Alliance) හි අනුග්‍රහය යටතේ දිවෙන ගෝලීය සමානාත්මතා ජාලයේ (Global Equality Network) ද සාමාජිකයෙකි.
දේශීය යාන්ත‍්‍රණ සමඟ සම්බන්ධ වීම
2016 දී ආණ්ඩුක්රම ව්‍යවස්ථා ප්‍රතිසංසකරණ ක්‍රියාවලියට දායක වීමෙන් LGBTIQ අයිතිවාසිකම් වෙනුවෙන් පෙනී සිටින්නන් ලෙස EQUAL GROUND සිය කාර්යභාරය ඉටු කළ අතර දිස්ත්‍රික්ක 9 ක PRC ඉදිරිපත් කිරීම්වල ඉදිරියෙන් සිටියේය. අප සංවිධානය මූලික අයිතිවාසිකම් පිළිබඳ පාර්ලිමේන්තු උප කමිටුව (2017) හමුවී ශ්රී ලංකාවේ ආණ්ඩුක්රම ව්‍යවස්ථාවේ මූලික අයිතිවාසිකම් පරිච්ඡේදයට LGBTIQ අයිතිවාසිකම් ඇතුළත් කිරීම සඳහා බලපෑම් කරන අතරම, වෙනස්කොට නොසැලකීමේ ප්‍රතිපත්ති සහ අපරාධයක් ලෙස LGBTIQ අනන්‍යතාව අර්ථකතනය නොකිරීමේ අවශ්‍යතාව ද පෙන්වා දුන්නේ ය. ප්‍රතිසන්ධාන යාන්ත්‍රණයන් සඳහා වූ විශේෂ කාර්ය සාධක බලකාය වෙත යෝජනා ඉදිරිපත් කිරීම් සිදු කරන ලද අතර, ජාතික මානව හිමිකම් ක්රියාකාරී සැලැස්ම වෙත ද අප සංවිධානය විසින් නිර්දේශ ඉදිරිපත් කරන ලදී.
ශ්රී ලංකා මානව හිමිකම් කොමිෂන් සභාව සමඟ අනු කමිටු සාමාජිකයෙකු ලෙස අප පුළුල්ව කටයුතු කර තිබේ. සිද්ධීන් පිළිබඳ ලේඛන ශ්රී ලංකාවේ මානව හිමිකම් කොමිෂන් සභාව වෙත ඉදිරිපත් කරන ලද අතර, සංක්රාන්ති සමජභාවී පුද්ගලයින් සඳහා ස්ත්රී පුරුෂ සමාජභාවය සහතික කිරීමේ ක්‍රියාවලියට උපදෙස් ලබා දීමටත්, ලිංගික දිශානතිය, ස්ත්රී පුරුෂ සමජභාවී අනන්‍යතාවය සහ ප්‍රකාශනය පිළිබඳ දිවයින පුරා විසිරී සිටින මානව හිමිකම් කොමිෂන් සභා නිලධාරීන් සංවේදීකරණයටත් EQUAL GROUND කටයුතු කර තිබේ. ශ්රී ලංකාවේ නීති ආධාර කොමිෂන් සභාව සමඟ අපි සමීපව කටයුතු කළ අතර කාර්ය මණ්ඩල සාමාජිකයන් සමඟ සංවේදීකරණ වැඩසටහන් පැවැත්වීම, නීතිඥ පුහුණු කිරීම් සහ නීතිඥ සම්මන්ත්‍රණයන් පැවැත්වීම, සහ ග්රාමීය ප්රදේශවල LGBTIQ පුද්ගලයින්ට වඩා හොඳින් උපකාර කිරීම සඳහා නීතිඥ සාමූහිකයක් ආරම්භ කිරීමට කටයුතු කළෙමු.
EQUAL GROUND විසින් ප්‍රමුඛ පෙළේ නීතිඥයින්, රාජ්‍ය නොවන සංවිධාන ප්‍රධානීන්ගෙන් සමන්විත උපදේශක මණ්ඩලයක් පිහිටුවා ඇති අතර පේරාදෙණිය මනෝවිද්‍යා දෙපාර්තමේන්තුව, කැළණිය මාධ්‍ය අධ්‍යයන අංශය සහ කොළඹ විශ්වවිද්‍යාල සමාජ විද්‍යා දෙපාර්තමේන්තුව සමඟ පුළුල්ව කටයුතු කර ඇත. එහිදී තරුණ කඳවුරු, සංවේදීකරණ වැඩමුළු පැවැත්වීම, ප්‍රලේඛන පුහුණුව, පොලිස් පුහුණුව, හෙද පුහුණුව ලබාදීම සහ මහනුවර ලිංගාශ්රිත රෝග සායනය සමඟ වසර 3 කට වැඩි කාලයක් කටයුතු කිරීම සිදු කෙරිණි. සංක්රාන්ති සමාජභාවී පුද්ගලයින් වෙනුවෙන් අපි ප්‍රමුඛ මනෝ විද්‍යාඥයින්, අන්තරාසර්ග විද්‍යාඥයින් සහ ප්ලාස්ටික් ශල්‍ය වෛද්‍යවරුන් සමඟ කටයුතු කර ඇත්තෙමු.